في البدايه لازم نعتذر لمتابعينا علشان ماتش الاهلي وحرس الحدود ... الحقيقة اني مشفتش الماتش ... لان مفيش ناس في العالم كله عندها كم الغباء الي يخلو ماتش الاهلي والحرس وقبله ماتش الزمالك في نفس معاد دوري الابطال ... اللعيبة نفسها عاوزة تشوف الماتش ...
الاهلي بيبدا اللقاء باكرامي في حراسة المرمي ... قدامه فتحي ربيعه حجازي صبري رحيل ... اثنين ارتكاز السولية وحسام عاشور ... عبدالله السعيد مؤمن رمضان ... تحت مهاجم وحيد مالك ايفونا ...
البداية كانت كويسة ... بنوصل كتير ... وبنسيطر علي الملعب بالكامل ... وكان من السهل اننا نخطف جون نموت بيه الماتش من بدري ...
دجلة بيمتلك مدرب محترم فهم الاهلي كويس ... وتقريبا استنسخ طريقه يانج افريكانزفي مواجهه الاهلي ... تقفيل منتصف الملعب من خلال تواجد عدد اكبر من اللاعبين ودا بيعمل زياده عدديه وبيسمحلهم انهم يضغطو علي حامل الكرة باكتر من لاعب ... اما يشوط اي حاجه او يمرر غلط .. ثم الاعتماد علي مرتده ممكن يكسبو بيها ...
مع تقدم الوقت مستوي الاهلي كان بيقل ومستوي دجله بيزداد ثبات في الملعب ... بيوصل الامر لقمته في اخر الشوط الاول كما في الصوره بنشوف حسام عاشور واقف بالكوره مش لاقي حد يلعبله ...
وجود الحضري الي يستحق لقب الحارس التاريخي حرم الاهلي من تسجيل هدف مبكر او متاخر ... الحضري شال اكتر من كوره ميقدرش يشيلها شريف اكرامي نفسة ...
كلنا انتظرنا تغيير كبير في مجري اللعب في الشوط الثاني .. لكن اسوء اداره فنيه في عهد مارتن يول حصلت ... حتي التغييرات الي اجراها بنزول مهاجمين كان علي حساب نواحي كتير ...
مع مرور الوقت والاداره الفنيه الرائعه من رينارد حسبنا ان الاهلي مش هيسجل حتي لو استمر اللعب لاربع اشواط ... في الوقت الي سحب في عبدالله السعيد وايفونا ومؤمن صاحب الواجبات الدفاعية كان بينزل كريم ممدوح الي قدر يوصل للمرمي في هجمه كان ممكن تكون جون ..
بنشوف فرق بتدافع بس بييجي وقت وتنهار امام سيل من هجمات المنافس ... بالعكس هنا في دجله .،. في الدقيقيه 77 كما في الصوره بنشوف التزام عالي من لاعبي المنتصف الي شكلو جدار دفاعي منع وصول الكرات للمهاجمين ...
الالتزام ده كان لازم يكلل بنتيجه كويسة ... الي بيتعب بيلاقي .. والي يضيع يخسر ... في الدقيقه 94 ومن مرتده وخطأ دفاعي ساذج بنخسر 3 نقاط هامه ....
رمضان صبحي بعد غياب ماتشين بيعود بمستوي سئ .. بيعتمد علي الفردية ... ولعب سلبي ميستفدش منه الفريق ...
مالك ايفونا ... مالك ايفونا ...، مالك ايفونا .... امتي هنلاقي التركيبه السليمه للولد ده ...
سؤال اعتقد كل الي بيحب الاهلي بيساله ... هو حسام غالي لما يبطل كوره احنا هنعمل ايه ؟ ... لسه لحد دلوقتي ملقناش البديل الي يقدر يعوض غياب غالي ... غالي بيربط الدفاع بالهجوم ... بيتحكم في سير المباراة ... يمتلك شخصيه قيادية في الملعب ... غالي الي بيشكل محطه لاي لاعب معاه الكوره ومش لاقي حد يلعبله ... المثلثات والمربعات الهجوميه لاتكتمل الا بوجود غالي ...
الخساره الاولي للاهلي 2016 ... الخسارة كانت جيه جيه ... الفارق بيقل ل 8 نقاط ... نوقف التصريحات الاعلاميه الي فيها ثقه زايده دي ... ونرجع تاني للمكسب .. وبسرعه ... احنا كجمهور لن نتحمل الكثير من الخسائر ...
بقلم
د.محمد انور
0 التعليقات:
إرسال تعليق