تحليل ماتش الاهلي والداخليه

في الوقت الي العالم كلو بيبتكر في عالم كره القدم ... تكنولوجيا بتستخدم للحد من اخطاء الحكام ... قوانين بتتجدد يوم بعد يوم .. بتحصل لقطه حصريه للايجبشين ليج ... عواد حارس الاسماعيلي بيتصدي للكره بايده من خارج منطقه الجزاء مع اشاده من معلق الماتش و تجاهل من كل الملعب والحكم ... والكوره كملت عادي خالص ... الامر الي انتشر علي السوشيال ميديا العالميه وبقي محل للسخريه..

الاهلي بيبدأ اللقاء باكرامي قافل المرمي ... خط الدفاع احمد فتحي علي بيه معلول سعد سمير محمد نجيب ... اتنين في المنتصف السوليه وغالي ... ادامهم 3 مؤمن السعيد وليد سليمان .. تحت مهاجم وحيد جون انطوي ...
زي دلوقتي من الموسم الي فات كان الداخليه الملقب بليستر سيتي الدوري المصري علي صداره الترتيب ... وكان ند قوي لكل انديه الدوري ... وكان بيمتلك مدرب علي مستوي عالي ولاعيبه بروح قتاليه ... لذلك حسام البدري تعامل معاهم اد حجمهم ولم يستهين بهم ...
الطريقه التقليديه 4 2 3 1 والاعتماد علي السوليه كبديل لعاشور في منتصف الملعب الدفاعي ... مع بعض الاضافات في بعض الاوقات بدخول وليد سليمان لمنتصف الملعب واحيانا صعود مؤمن كمهاجم تاني مع اعطائهم حريه الحركه ...
احد العيوب لعاشور هو عدم المشاركه الهجوميه البناءه ... لكن بيغطي علي العيب ده ثباته الدفاعي الشديد والي بيقفل منطقه منتصف الملعب ... مشاركه السوليه كانت ايجابيه جدا ... اعطي لحسام غالي حريه الحركه دفاعا وهجوما ... السوليه عنده قدرات دفاعيه وهجوميه ولاعب متوازن جدا .. بتحرك بحساب ... بيخترق .... عنده سرعات ... محتاج لماتشات بس ...في كثير من الاوقات كان الداخليه بيعتمد علي صتع موقف واحد لواحد ما بين مهاجميه بنجامين واجوجو ضد سعد ونجيب ... والي احيانا كان بيتفوق فيها مهاجمي الداخليه .. لكن التغطيه الجيده من فتحي ومعلول والارتداد السريع لعمرو السوليه ..، والعوده الدفاعيه لمؤمن زكريا حالت دون حدوث خطوره علي مرمي اكرامي ....
تناقل الكوره بسرعه بين الرباعي الهجومي عمل ارتباك شديد في دفاعات الداخليه ... وبكوره اتنقلت مابين مؤمن ومعلول وغالي وجد جون انطوي نفسه في مواجهه مرمي الداخليه وبيسجل هدفه الاول هذا الموسم ... هدف اعاد جون انطوي للطريق مره اخري ...
التغطيه علي السكند بول من السوليه وبمشاركه غالي كانت كفيله بان تيم الاهلي يركب الماتش بلغه الكوره ... اضف الي ذلك اوفرلاب معلول المتكرر الي بيعمله بكفاءه كبيره واما انه يسحب معاه لاعب فيفتح الطريق لمؤمن او يستلم الكوره ويمتعنا بعرضياته ...
الماتش كان في لقطات حلوه كتير اخترت منها لمسه غالي في الهدف التاتي ... لمستين بيلخصو كل الكلام ... قراءه للملعب ... دقه ... مهاره ... في الصورتين بنشوف غالي بيعمل بينيتين لمؤمن بتفس الطريقه و بنفس الاتجاه علشان يسجل مؤمن الهدف التاتي ...
المشاركه الدفاعيه لطرفي الملعب الهجومي اصبحت ضروره في عالم كره القدم ... ولو متمتش بيظهر فريق منعزل هجوميا و دفاعيا وسهل اختراقه كما في ماتش الزمالك وصن داونز ... مؤمن بيؤدي الحته دي كويس جدا نظرا لمجهوده العالي ... و دا الي بيخلي اي مدرب يتمسك بمؤمن في الملعب حتي وان كان دون المستوي ...
مكاسب المباراة كانت كتير جدا اهمها وابرزها عوده اكرامي من جديد ... اكرامي الي قدر يحافظ علي شباكه نظيفه مع هجمات خطره جدا من الداخليه ... المكسب التاني انطوي بيعود للتسجيل ... السوليه بيكتشف نفسه من جديد ...
اضف الي ذلك نزول ميدو حابر وصالح جمعه للملعب ولو لدقائق معدودة علشان حساسيه الماتشات ...
من الواضح ان البدري والاهلي قدرو يستفيدو من فتره التوقف و اللعيبه اكتر انسجاما وواقعيه ... كل دا اعطي للاهلي شكل مميز في ابرز مبارياته منذ بدايه الدوري ...
للمباراه الاولي مع البدري بيبدأ جمهور الاهلي يحس بشئ من الارتياح والامل ...
نتمني انها متكنش مباراة عابرة و ان الماتشات الجايه تكون احسن واحسن ...

التقييم الرقمي للاعبين

اكرامي 10
فتحي 7
سعد 7
نجيب 6
معلول8
غالي 9
السوليه 9
وليد 5
مؤمن 8
السعيد 7
انطوي 6
ميدو حابر .....
صالح جمعه .....

شارك هذه الصفحة وتابعنا على صفحاتنا الرسمية

شارك الموضوع →

تويت

تابعنا →

إنشر الموضوع →