عودة من جديد لاهم اسباب فرحة شعب الاهلي ... الدوري بيعود بعد توقف ومعاه الاهلي بيعود للانتصارات ....
الاهلي بيبدا اللقاء باكرامي ... سعد سمير وربيعه ... صبري رحيل احمد فتحي .... حسام غالي حسام عاشور ... وليد مؤمن السعيد تحت مهاجم وحيد مالك ايفونا ....
بنفس الخطة والتكتيك بيلعب الاهلي مباراته بعد العوده من التوقف المؤثر سلبيا علي مستوي اللعيبة وحساسية الماتشات ... ودا كان اسباب انخفاض المستوي في الشوط الاول ... الخطة التقليدية 4 2 3 1 كانت بتتحول في بعض الاحيان ل 4 4 2 بتقدم مؤمن زكريا كمهاجم تاني بجوار ايفونا ... مؤمن زكريا كان محور الخطر في كتير من الاحيان .. وواضح جدا اقتناع مارتن يول بمؤمن بسبب مجهوده الوفير ومشاركته في الدفاع والهجوم بجانب قدرته التهديفيه وصناعه الفرص وعلشان كده هو دا جوكر مارتن يول واحد الاعمدة الاساسية جدا في التشكيل .. اصابة عبد الله السعيد كان خسارة كبيرة للاهلي لنهاية الموسم .. لكن خروج السعيد اجبر مارتن يول علي تغيير تكتيكه في كتير من الاحيان كذلك الدفع بلاعبين يستحقوا الفرصة زي صالح جمعه ... صالح جمعه اللي في رايي لو لعب جنب رمضان هيعملو جبهه +18 ...
قوه كبيره موجوده في صالح ان بيقدر يلعب البينيات من مسافه طويله جدا يقدر يضرب بيها اكتر من خط ...
بنشوف مع المدربين الكبار في الفرق الكبيره تغيير كبير في الاداء في الشوط التاني ...ممكن تكون محاضره بين الشوطين نفسية فقط وتخلو من الامور الفنية ... اشهر واحد طبعا هو يورجن كلوب الي بيقدر يشحن لاعبيه لدرجه كبيرة ... بنشوف في كتير من الماتشات للاهلي تغيير كبير فعلا في شوطي المباراة ... من الواضح ان في شغل وكلام كتير بيتقال بين الشوطين ...
نزول رمضان جنب مؤمن ووليد تحت السريع ايفونا اعطي ميزه هجوميه للاهلي وتنوع كبير ..، وقدر مالك ايفونا بمهارته العاليه انو يسجل هدفين ليصل للرقم 12 في اولي مواسمه وهو مالم يفعله افريقي اخر مع الاهلي .. واحنا علي ثقه ان لم يقدم افضل ما عنده حتي الان ...
يمتلك ايفونا مميزات لا تتوافر في اي مهاجم في مصر حاليا ... ايفونا عنده سبرنت سريع جدا وبيقدر يسبق اي لاعب في الدوري حاليا في اول 3 او 4 متر ... دا بجانب مهارته الفرديه وقدرته علي تجاوز واحد لواحد او واحد لاتنين ودا وضح في ماتش الزمالك ...
الاهلي كان ممكن يكسب اكتر من كده في مواجهه فرقه عنيده زي الداخليه ...
متعودناش نتكلم كتير عن التحكيم لاني علي ثقه ان اخطاء التحكيم جزء من اللعبه ويوم هتكون ليك ويوك هتكون عليك ..، واليوم الي هتكون علينا فيه مش هنتكلم عليها الا لو كنا فعلا ادينا وكنا نستاهل نكسب .... بمعني اخر مبنعملش لنفسنا شماعة نعلق عليها مستوانا السيء زي ولاد العم الي بيخسروا لالفي سبب الا انهم مبيلعبوش كوره اصلا ... وبتتنوع الاسباب بين التحكيم وحظ الاهلي والمؤامرات ....
لازم علي مدار الماتشات لازم كل اللعيبه تاخد فرص في اطار ميبوظش التشكيل علشان نقدر نحكم علي من يستمر ومن يمشي ... مش معقول واحد زي احمد الشيخ يجي ويمشي بعد الضجه الي حصلت ومنشفش ماتش ليه اساسي في الدوري ...
الاهلي بيصل لنقطه 71 علي قمة الدوري ... الماتش الجي مع ابناء بورسعيد ..، لو اتعادلنا هنوصل للنقطه 72 ... ولو فزنا هنبقي 74 ... علشان نفتكرهم 74 شهيد في الجنة ...
#افتكروهم
بقلم
د. محمد انور
0 التعليقات:
إرسال تعليق